Jon-Roar Bjørkvold vart tilsett som universitetslektor i musikkvitskap ved UiO i 1970, først som lærar i satslære. Han gjekk deretter videre til å undervise i musikkhistorie og musikksosiologi, og vart professor ved instituttet i 1982. Han hadde ansvaret for utviklinga av storfaget i musikkvitskap, som kom på plass i 1984. I dette storfagstillegget var formidling, musikalsk utøving og forholdet mellom teori og praksis vesentleg. Bjørkvold si utvikling av storfaget var vellukka, og faget vart tilbydd studentane ved IMV i 20 år, fram til kvalitetsreforma i 2004.
Bjørkvold vart dr.philos. i 1981 med avhandlinga Den spontane barnesangen – vårt musikalske morsmål. Han var opptatt av visse formlar og melodiar hos barns melodirepertoar. I 1979 kom han med den populære songboka Barnas egen sangbok. Andre sentrale publikasjonar er Det musiske menneske (1989), Skilpaddens sang (1998) og “Vi er de tusener...” – Norske musikkhistorier (2003). Også Bjørkvolds bøker om filmmusikk kan trekkast fram, for eksempel Fra Akropolis til Hollywood. Filmmusikk i retorikkens lys som kom ut i 2. opplag i 1996.
Bjørkvold forlét Universitetet i Oslo i 2005.
Les meir på Bjørkvold sin eigen heimeside og blogg freidig.no.